• Praia
  • 29℃ Praia, Cabo Verde
Manitu Bonba
Cultura

Manitu Bonba

Skesedu di punde ki bendu

Modi ki txigadu ta txera fedi

Mas subidu na stribu bazofiadu

Bazadu koxi, kapridu pedi.

Pa juventudi prometedu tudu

Pa más bedju tudu skesedu

Pois, di bedju sodadi ka tendu

Pamodi bedju ta konxes-s dretu.

Bedju sabe ma es e koitadu,

Pobri, fidju’l pobri, mal-lobadu

Ki riba’l kama di kósta detadu

Te manxe linpu ku odju ragaladu.

Ta fase krus na bóka un-riba-d’otu

Ta fla: «oh deós ka nhu leba-m so si»

I tudu família, nton ta rusponde:

«Nhu libra-nu di mama-m buâ».

Ses kaleron na kantu’l funku

Baziu, labadu, bóka nborkadu

Kintal sen lenha, fogon sen lumi

Armunsis tudu ku mo na stangu.

Mas e txiga na fonti xeiu di sedi

E bebe e basta, e kóka na águ

Burgónha perde-l, ruspetu kaba-l,

E fika ta bebe so Águ Trindadi.

E djuntadu nel, kusa maria-l

E perde sima Noku na bóka Lagoâ

Dja e torna parse ku rostu linpu

Ku promésa na trabadja digrasa.

E fla ma e ta trabadja sen saláriu

Mas tanbe kel-la ka e nesesáriu

Ku saténta kontu pa rénda´l kasa

Ta da pa kume/bebe di li 4 anu.

Inda ku juda di kustu na kada viaji

Sekretária skodjedu pa kunpanha-l

Ku karu nobu, konbustível te bóka,

Lus ku águ, telefoni ku Internet di bórla.

I koformi análzi di un versadu

Noku raforma, sai, dexa más nobu

Manitu Bonba sai, kunsa raforma

Ago e kre torna ben tra más nobu.

Mas kenha ki entra sen vitória

Fladu ma ta sai senpri sen gulória

Pamodi ma es fepu, na maioria

Es e un kanbadas di porkaria

Partilhe esta notícia

SOBRE O AUTOR

Redação