Cultura

Cultura

DOS EX TA KOBA KUNPANHERU – Tersera párti

• Por Armindo Tavares
• 17 de Abr de 2021

Malandru e Maruka di-bo. Ki e diferenti di tudu algen. Te di Santu. Son Pedru flaba ma so e ta kriditaba si e odjaba. Maraku fla ma si nu kridita na kultura, ma nu ta odja-l. Ker dizer ki kultura e so pa kenha ki ten fé. Sima kusa ki nhos ka sta kumunista más!

PIREKIS – Bo ki e karteirista. Ki é spisialista na dispixa kartera di povu.

VERGINHA – Bu ta prova di kusa ki bu sa ta fla?

PIREKIS – Si N ten próva?! I bo bu sabe-l. Oliás, tudu mundu sabe. Kenha ki dja skese di kazu di ENAKOL ki 11 mil kontu buâ? Di Finansa di Santa Krus ki fika sen 22 mil kontu na kofri? Di terenus na Palmarexu ku di Txada Sonflipi ki nhos bende fepu?

VERGINHA – Nenhun di kes kusas la ka foi mi ki fase!

PIREKIS – Ka bo ki fase, mas foi bu rapasis. Foi bus Dotoradus konpitentis. Dotoradus na furta! Bu ka debe tanbe sta skesedu di skandula di Enbaxada na Portugal ki na un jantar bus kontenplama gasta 600 kontu di dinheru di povu?!

VERGINHA – Ami sertu, N ka érta Enbaxador.

PIREKIS – Bu ka éra Enbaxador, mas kel ki staba la e bo ki po-l.

VERGINHA – N ka kóre ku el?!.

PIREKIS – Promovedu PCA di CVTelekom, ku ordenadu kuazi sinku bes más.

VERGINHA – U ki nteresa e ki e fase bon trabadju. Dinheru ki e gasta ka foi so na jantar. Tanbe e kunpra ropa pa e raprezenta kondiginamenti nos país.

PIREKIS – E verdadi. So trus ki e ka kunpra. Até N ta lenbra kantu ki e fla ma e ta anda ku kabésa labantadu, ki nha Maruka txokota ku el: «Modi ki bu ka ta anda ku kabésa labantadu? Bu ka ta bisti trus!»

VERGINHA – Bu Maruka e loku. El propi e fla ku se bóka! Bu sta lenbra di un klip ki e fase nunpriti, ki e kanta e fla: «N sta dodu, dodu, dodu».

PIREKIS – Ah si e obi-u! E ta po-u kóre se dianti sima kabalu lazon.

VERGINHA – Pamodi? El e ka loku me? Kusé ki bu ta atxa di un ómi ki ta bisti di musulmanu i ta adora Deos xines?

PIREKIS – Deos xines? Kabésa dja ba-u o ké?

VERGINHA – Bu ka obi na Televizon ma dja e kiria BUDA?

PIREKIS – Abo e mesmu parvu! BUDA siginifika: Biurô di Direitus Outorais.

VERGINHA – N ta spéra so ma es Biurô ka ta ben perde alguns létra pa ka fika un palavra feiu… pa ka fika skrebedu nomi artístiku di Maruka.

PIREKIS – So inveja ki bu tene! Ideia bu ka ten! Maruka e intelijenti. E dvogadu, múziku, konpozitor, pintor, puéta, dramaturgu, romansista i, kaba go e ministru.

VERGINHA – Marseneru bu ka fla.

PIREKIS – Marsenáriu?!

VERGINHA – Tanbe podia ser, mas, pur akazu, ka si ki N fla. N fla «marseneru». Na kiriolu ta fladu tanbe: «karpinteru».

PIREKIS – I pamodi ki el e karpinteru?

VERGINHA – E ka fase un banku? Un omi ki fla ma e ten un banku, bu ta bai se kasa bu ka ta atxa-l nen ku moxu pa bu xinta nel… e ka maluku? E más pior ki Pinókiu.

PIREKIS – Sima ki nhos ka ta konta mentira! Anhos nhos kustuma fla ma nhos ta kiria 45 mil postu di trabadju, mas na fin di nhos mandatu nu berefika ma nhos distrui dés mil ki nhos atxa. Nhos dispidi tudu kenha ki ka éra di-nhos.

VERGINHA – Mentira ki bu konta. Trabadjadoris ki nu kóre ku el, e kes ki nhos fase kontratu dipos ki dja nhos perde na urna. Kes ki nhos ta prémiu pamodi es dsagi na algen na nhos kanpanha.

PIREKIS – Djon ki konxe Djon. Ago, fla-m di ki banku ki bu sta papia? Di Banku di Kultura?

VERGINHA – Izatamenti. E foi kiriadu pasadu kuazi kuatu anu, ku tudu bazofariâ, nun purjetu ka da dinheru pa komesa.

PIREKIS – Pamodi ki nhos ka ta purgunta kusa kel ó ki nhos ka sabe? Abo Nha Kréntxa di Fonti Lima ka dadu dés kontu pa e fase bindi ku muringu? (Verginha ratxa grasa) Kusé ki bu ai ta ri? Panpana di Entri Piku Réda ka dadu 5 kontu pa e fase sextu di padja’l tánbra, ku basora di binbirin, kankaran di karis, stera di tabuga ku artizanatu di txifri ku kaska’l koku?

VERGINHA – Ahahahah! Koitadus! Kréntxa dés kontu… Panpana sinku kontu…

PIREKIS – Ri te bu xuxa? E más midjor di ki nada.

VERGINHA – Maruka ka flaba ma e ta daba es 30 mil kontu?

PIREKIS – Inda e ka da, mas ka pasa tenpu. Banku ten so 4 anu ki kiriadu.

VERGINHA – Kuatu anu e poku?!

PIREKIS – Inda e ta da mutu más, di serteza. Povus ta torna da-nu más un mandatu di serteza.

VERGINHA – Tra bóka! Bóka fedi!

PIREKIS – Spéra bu ta odja!

VERGINHA – E ta da mutu más inda sin. Mutu más pa kenha ki e di nhos kulubri. Koitadinhus. Ku sinku kontitu gosi, un saku di simentu i dos bara di verginha… (e ta ragala odju e ta djobe Verginha) Oh! Verginha e mi. Diskulpa-m. Dos bara di feru dipos, ses votu ku di tudu ses família nhos ten sertinhu.

PIREKIS – Odja modi ki bu sabe ton dretu modi ki kusa ta funsiona! Malandru.

VERGINHA – Malandru e Maruka di-bo. Ki e diferenti di tudu algen. Te di Santu. Son Pedru flaba ma so e ta kriditaba si e odjaba. Maraku fla ma si nu kridita na kultura, ma nu ta odja-l. Ker dizer ki kultura e so pa kenha ki ten fé. Sima kusa ki nhos ka sta kumunista más!

PIREKIS – Kumunismu e más midjor di ki bu kapitalismu. Rapara na kazu di ENAKOL, ki até bu ranja un ajudanti pa djuda-bu ordinha baka?

VERGINHA – Ajudanti, nau. Toma kudadu ku bus palavrinhas. El éra nha visi.

PIREKIS (ta ri) – Baka fika loka sima nhos ki ka ntende ku kunpanheru, ki raparti na más di kasekantu padás.

VERGINHA – Bo e propi diskaradu.

PIREKIS – Diskaradu e bo, i tudu kes-otu di bu laia. Dja bu skese kantu ki bu da kes bu ministrinhus pontapé na rabioski?

VERGINHA – N kóre ku es tudu-fepu, pamodi es e so otrevidu.

PIREKIS – Mas dipos, sen burgónha na rostu, es torna ben linha ku bo, kel makabeu, ku djuda di nha kamadara Djuzé di Nébua, konsigi txiga la napunde e sta. Lugar ki bu konxe striba bu ka konsigi.

VERGINHA – N ka konsigi pamodi bu furta-m. Ladron! I bu furta-m dos bes.

PIREKIS – Ma dja e si bu ta abri odju, kamaron asadu.

VERGINHA – Bu devia éra xintiba burgónha! Na un bu ganha-m pa dizaséti votu, mas ben fika provadu ma dizotu éra gamadu.

PIREKIS – Si dja N furta-u dos bes, sinhor kamaronsinhu, o mi e mutu pirata, u ki e pa loba i ngaba na un pulítiku, o bo e un grandi ásnu. (Verginha ta da-l soku, ta nbaxa ta karega-l ta latxi-l na txon. Un Polísia mudjer ta txiga, moku toradu, ta da Verginha ku manduku. Verginha ta bira rostu e ta da ku Polísia, e ta dexa Pirekis rabida-l, e ta fika dibaxu, Polísia ta da Pirekis ku kaseti. Es ta labanta es ta fika sakedu) Kel-li e kusé, senhóra Ajenti di Otoridadi?

• AJENTI – Nhu fitxa fusinhu, dilunkuenti.

PIREKIS (ku jéma na mo) – Mas pamodi, senhóra Ajenti?

AJENTI – Pamodi bo e dilunkuenti.

PIREKIS – Mi?!

AJENTI – Va, modi ki e bu nomi?

PIREKIS – Komandanti Pirekis.

AJENTI – Kumandan… ké?!

PIREKIS – Pirekis.

AJENTI – Komandanti Pirekis?!

PIREKIS – Sin, senhóra Ajenti.

AJENTI (pa Verginha) – Bu sa ta dadjiba na nos Ex? (E ta da-l más un trotxada) Bu sta prezu. (E ta tra Pirex jéma e ta poi Verginha) Insuretu, rostu ma Tagi.

VERGINHA – E el ki da-m purmeru.

AJENTI – N ka kre ki sabe. (E ta da-l un tabefu) Modi ki bu txoma… bagamundu?

VERGINHA – Dotoradu Verginha.

AJENTI (tristornadu) – Modi ki nhu fla?

VERGINHA – Dotoradu Verginha.

AJENTI – Nos sugundu Ex?!

VERGINHA – Sin, senhóra Ajenti.

AJENTI (ta txora timenti e ta tra-l jéma di mo) – Nhos diskulpa-m, pur amor di Deos, senhoris Ex. Ami e pobri, N ten sais fidju pekinoti pa N kiria, nha maridu ta bebe txeu, kaba e sta dizenpregadu, dja dura.

ENPREGADA – Anha e Polísia… nha ka konxe nos Ex?

AJENTI – Dja N kustuma odja-s ta parse na Televizon. Un bes, na altura di kanpanha, N odja Sr. Dotoradu ta toma nhas bizinhu nómi pa e manda leba-s reia, ku simentu, ku féru pa es bai lája kasa ku el.

ENPREGADA – Anha, teoxi nha ka dadu?

AJENTI – Ami N ka dadu teoxi. Mas nha armun go, komu e fla-s ma se votu e na Dotoradu, es leba-l un karu di reiâ ku dés saku’l simentu, e fase bloku, e fase un kuartu’l kasa na kintal (Pirekis ku Verginha djobe pa kunpanheru) Pur favor, sinhoris Ex, ka nhos kóre ku mi di nha trabadju pur amor di nhas meninu ki sta tudu pekinoti.

PIREKIS – Nha ka sabe le? Nha ka ten sugundu grau?

AJENTI – Nau, sinhor. N sabe so sina nha nomi. N ten 1ª fázi di alfabetizason… mas kuazi N ka ta baba skóla.

ENPREGADA – E sta sima sima un asesor di Prezidenti di Kanbra ki N konxe, ki ta ganha un-monti dinheru, mas ten txaskan sugundu anu di siklu, ku média di novi valor i meiu. Kaba e bazofu, go… ki nhu ta pensa e Dotor.

VERGINHA – Nton modi ki nha kanba na Polísia… si nha ka ten kuarta klasi?!

AJENTI – Un Xefi ki N ta daba bóita ku el… ki N ta nganaba nha maridu ku el, ki po-m.

PIREKIS (pa Verginha) – Di serteza e algun Xefi di bu tenpu.

VERGINHA – N ka sabe pamodi ki bu ten odju na nos?!

PIREKIS – E ka mi ki ten odju na nhos! E ki nhos e pirata dimás! Bu ka rapara modi ki «SIC», Televizon Portuges, sa ta pasa un raportaji unde nhos Ministru di Nogosiu Stranjeru bende un Pasaporti Diplomátiku pa 5 mil i 400 kontu.

VERGINHA – Bende Pasaporti pa 5 mil i 400 kontu?! N ta kre pa mentira ta intxaba algen bexu!

PIREKIS – Bu kre nega? Un finansiador di Partidu «XÉGA» na Portugal ka da-l un Mersedi ki ta kusta kuazi 50 mil euro, pa e po-l Konsul na Mérka, el ku se mudjer.

VERGINHA – Bo bu fla ma e bende Pasaporti Diplomátiku pa 5 mil i 400 kontu!

PIREKIS – N fla i N ta konfirma.

VERGINHA – Bóka e di-bo!… Bu pode fla.

PIREKIS – Konsul Onoráriu ka ten direitu na uzu di Pasaporti Diplomátiku?!

VERGINHA – Ka bu xatia-m. (E ta vira pa Ajenti) Kenha ki éra kel xefi ki mete-nha na Polísia?

AJENTI – Dja e móre. El éra konbatenti.