Pub
Por: Armindo Tavares

armindotavares1 

Ka nu tra máskra pa nu da beju

Sen kamizinha, so ka nu nobega.

Si móre sedu inda e ka nos dizeju

Nton nu xinta na kasa nu susega.

 

Nu odja ma Kovid e ka sinpátiku

Ma mantenha, algen e ta fla poku

E ta pasa na nos, bistidu ratorku

Ku koroâ na kabésa, senpri moku.

 

Si e fla mantenha… e so sanadu,

Beju o mozada, nen si e pagadu,

Abrasu tanbe… so pa e ka dadu

Pamodi ael e sta tudu infetadu.

 

Distansiamentu sta obrigadu,

Pur isu, si di lonji ka pasadu

Na stilu Tagi mo pode stikadu

Mas na kunpanheru pa ka roxadu.

 

Fórti kabu go, bira mariadu

Kel-li kre propi e so pekadu

Anos di gosi nu ta strobadu

Kel midjor kusa ki ta fasedu.

 

Si nu mexe la na párti-riba

Nu pode panha Koronavirus

Si nu toka-s na dentu-meiu

Nu ta atxa SIDA la ta smira.

 

I na párti-baxu nu ten dos pe

Ki ta leba-nu senpri unde e kre

Ki sikré nu katrisa kóntra maré

E ka ta nporta ku leba-nu simé

 

Ze Máriu kanta na Bulimundu

E fla: «Nen diriba, nen dibaxu».

Komu dentu-meiu nada ka fladu

Nton, nhos nu madja nos dizeju.

 

Pa más ki nos e grandi amigu

Mantenha nu fla senpri di lonji

Si na tental, nu ka ten remedi

Rostu pa ladu, nu da kutubelada.

 

Palmarejo, 27/07/2020

 

Comentar