Pub
Por: Armindo Tavares

 armindotavares1

X SÉNA

Soldadu Baretu sta dianti se funku, ku mo na kexada, ta da riba ta da baxu.

SOLDADU BARETU – Áh distinu! Áh kulpa rixu! Sais saku di dinheru… na menus di un sumana… N perde-s fepu la Pónta Belen… na djogu batóta. Sais saku di dinheru!… Baretu, dja txiga maré di bu seta go… ma kenha ki nâse di kaminhu pa baxu, ka ta stribadu ku el pa podu di riba. Áh distinu! Áh sórti malvadu! Áh batóta… bo ki tene-m ta butuperia. (Bedju parse) Nhu Bedju?!

NHU BEDJU – Baretu, N ben li pa últimu bes, pa N ben fla-u un kusa.

SOLDADU BARETU – Pa últimu bes, Nhu Bedju? Nhu ai ta móre, o nhu ai ta nbarka?

NHU BEDJU – Nau. Ami N ka ta móre, N ka ta nbarka.

SOLDADU BARETU – Nhu ka ta móre? Akel? Anho e algun purpetu?

NHU BEDJU – Nau, rapasinhu. N ka purpetu, N ka ta móre, N ka ta nbarka.

SOLDADU BARETU – Nton… Anho e kusé? Anho e kundengu?

NHU BEDJU – Kusé ki e kundengu?

SOLDADU BARETU – Kundengu e Kusa Kalinpu… Odimóni.

NHU BEDJU – Nau. Ami e Nhor Dés.

SOLDADU BARETU – Ave Mariâ! Dja N diskunfiaba.

NHU BEDJU – Bon… N ben so pa N ben fla-u pa bu pidi-m kusa ki bu kre, pamodi, ami dja… bu ka ta odja-m nunka más.

SOLDADU BARETU – Kusa própi ki mi N kre, ki nhu sa ta manda-m pa N pidi-nho, Nhu Bedju? (E ta tapa mo na bóka) Oooh! Nhu diskulpa-m: “Nhor Dés”.

NHU BEDJU – Kusa ki bu kre, bu pode pidi-m. Ka dja N fla-u?

SOLDADU BARETU – Náaah! N kre nton pa nhu da-m sórti na djogu batóta, ki kel ó ki N bai djuga la Pónta Belen, pa N ganha mi so. Pa N fali-s moku, pa N kunpra-s tudu ses buji­ganga, pa N toma-s ses mudjer ku ses fidju fémia, pa N kun­pra tudu kasa ki ten li riba Praia.

NHU BEDJU – E kes li propi ki bu kre?

SOLDADU BARETU – So kes li ki N kre, Nhor Dés.

NHU BEDJU – Bu ka kre más nenhun otu kusa?

SOLDADU BARETU – Más nada. Si nhu bai te ki nhu da-m sórti na djogu batóta, kes-otu kusa… N ta ranja-s dimi-pami.

NHU BEDJU – Ok. Mas bu ten serteza ma bu ka meste más otu kusa?

SOLDADU BARETU – Más nada, Nhor Dés.

NHU BEDJU – I salvason… bu ka kre salva bu alma?

SOLDADU BARETU – Salvason?! Ka dja N fla-nho ma kes otus kusa N ta buska ku nha mo?

NHU BEDJU – Bon… nton bo ki sabe. Bu juís bu orédja.

SOLDADU BARETU – Tanbe, N ta fla-nho: si N striba ki N konsigi, ka nhu toma.

NHU BEDJU – Si bu bai te ki bu konsigi… kel ki bu konsigi N ta dexa-u ku el.

Es nbrasa konpanheru, es raparti es bai kada un pa un ladu.

SOLDADU BARETU (bai tité, bira txoma Nhu Bedju) – Nhu Bedju! Dja go… nhu ranja-m la un-vinti, pa N bai fase un peskinha. Kau oxi sta-m un kóxi mau!

NHU BEDJU – Bu pode bai, sin ki bu txiga ta parse algen pa kasa-u un mo.

XI SÉNA

Son Pedru sta xintadu na se kaderon, na pórta di Seu, ku un katxu di txabi na mo. Nhor Dés txiga na el, e labanta. Nhor Dés mostra-l un letratu di Soldadu Baretu.

NHOR DÉS – Pedru, kel mos li, kel ó ki e txiga, e pa ka dexa-l kanba.

SON PEDRU – Sin, senhor Nhor Dés. So ma dja Nhu fla-m. Ali e ka ta kanba kifari pa e xinta. Sikre e rondia. E ka ta finka pe nen na soléra. Nhu fla-m so modi ki e txoma.      

NHOR DÉS – E txoma Baretu. Mas e konxedu más pa Soldadu Baretu.  

SON PEDRU – Nhu pode dexa ku mi. Ó ki e ben N ta mostra-l napunde ki se kuartel fika.

Nhor Dés da rikada bai, Son Pedru torna xinta na se kaderon.

XII SÉNA

Soldadu Baretu konko na pórta, Son Pedru purgunta-l, xintadu di punde e sta.

SON PEDRU – E kenha?

SOLDADU BARETU – E mi Baretu.

SON PEDRU – Baretu?!

SOLDADU BARETU – Aian!

SON PEDRU – Ki Baretu? Soldadu Baretu?

SOLDADU BARETU – Ezatamenti. Soldadu Baretu.

SON PEDRU – Soldadu Baretu ka ten lugar na Seu. Pur­tantu… pa Infernu.

Son Pedru nkrusa se pe, e pega se rozadi e poi ta rasa.

XIII SÉNA

Soldadu Baretu torna bai konko na pórta di Seu, ku mil Finadu maradu na kórda, e ta rasta. Son Pedru pára di rasa, torna purgunta.

SON PEDRU – E kenha?

SOLDADU BARETU – E mi Soldadu Baretu, kunpanhadu ku mil alma.

SON PEDRU (abri pórta) – Mil alma pa dentu (finadus fika ta rotxa ta kanba dezordenadamenti) Nhos pára si. Ka meste rotxa. Seu e grandi, ta txebe nhos moku. Anhos ki dja ben Seu, e pamoi Nhor Dés dja purdua-nhos, nhos ka tene pekadu… nhos sta tudu lebi, nhos ka ta faze pezu na Seu. (Un Deputada fika ta fra na meiu di Finadus ta kanba. Son Pedru xatiâ ku el) Bu ka obi kusé ki N fla? Abo ki sa ta bai ku kel pasu largu bai la? Modi ki bu txoma?

AISUL – Deputada Aisul.

SON PEDRU – I pamodi ki bu sta ben dipadianti si, Aisul?

AISUL – Pamodi mi e Líder Parlamentar i rasponsável pa lei di paridadi.

SON PEDRU – Kusé ki kel-li go ten a ver ku li riba na Seu?

JANDIRALMA – Ael e si, Son Pedru! Dasdi kantu nos éra bibu. Kunfiada.

AISUL – So kasi, Son Pedru. N sa ta difende interesi di mudjeris pamodi la na Téra e senpri omi ki ta sta dipadianti. Pur isu N sa ta djobe si li na Seu, pelu menus, mudjer ta ser más ben-tratadu

SON PEDRU – Anhos nton e so pulítikus ki sta li?

PERINHA – Kuazi tudu.

SON PEDRU – N ten un lista di nomis di Pulítiku ku Majistradus ki ka pode kanba na Seu. Mas kes ki dja sta li dentu dja, ta fika. I kes ki inda ka kanba… ten ki volta pa Infernu.

Riba’l pórta, un pe fóra un pe dentu staba Kola Obu ku Modjadu, ladu a ladu ta pintxa kunpanheru ku onbru pa odja kenha ki ta pasa kel otu.

KOLA OBU – Pora, Modjadu! Bu ka odja ma bu sta rotxa-m?

MODJADU – Mérda, Kola Obu. Ki sta rotxa-m e bo.

SON PEDRU – Pamodi ki nhos sa ta pintxa kunpanheru?

KOLA OBU– Modjadu e kubisozu.

SON PEDRU – Pamodi ki bu sta fla si?

KOLA OBU – Pamodi so e odja algen ta faze un kusa e kre fase tanbe!

SON PEDRU – Kusé, pur inzenplu ?

KOLA OBU – Kantu nu staba bibu, N kiria nha Enpreza pa N ta bende txon pa fasedu kasa bunitu, pa N bende águ, leti, sumu, ku iogurti… siumus da-l e kiria di sel tanbe… e poi nomi NHA BES! Tanbe da uma brónka!… Sima el éra papiador na Parlamentu… konfuzentu propi… e bira sima kusa ki ratu nheme-l língua.

SON PEDRU – Bon… un di nhos pode kanba. Ago… nhos disidi.

ROZADI – Son Pedru, nhu po-nu vota na kál ki e pa kanba.

JANDIRALMA – Ali, abo e ka líder nau, Rozadi. Dexa di kunfiadésa!

ROZADI – Kunfiada e bo. Pamodi ki bu ka ta fla Perinha si. El ki e di bu listra.

SON PEDRU (pensa un-bokadu) – Ok… komu oxi N ka sta pa mutu xatisa, dja nhos ben, nhos pode kanba. Mas Soldadu Baretu pa Infernu.

Finadus tudu la dentu, Nhor Dés txiga.

NHOR DÉS – Kel li e kusé ki dja bu fase, Pedru?!

SON PEDRU – Kusé… kusé?

NHOR DÉS – Abo ki dja intxi-m Seu di Tagi di kel manera li?!

SON PEDRU – Es e ka Tagi nau. Es e so Deputadus, ku Ministrus, ku Enprezárius ki sta li?

NHOR DÉS – Sin. Es ka staba tudu la Infernu… ki N manda-s? Kenha ki bem ku es li?

ROZADI – Baretu ki ben ku nos.

NHOR DÉS – Mas anhos nhos ka podia benba Seu. Son Pedru, nu tene problema. Si nu ka toma kudadu es ta ben bende tudu txon di Seu.

SON PEDRU – Ami N ka sabeba.

NHOR DÉS (ta konta Finadus) – Unde más dos?

JANDIRALMA – Djondjon Diabinhu ki fase votu, e pega nomi di Montanha ku Dorada e tra. Es fika la Infernu.

NHOR DÉS (djobe Son Pedru) – Bu pode dexa-s kanba, mas fika-m ku odju nes.

SON PEDRU – Tudu es?!

NHOR DÉS – Menus Baretu.

SON PEDRU – Aaaan! (Pa finadus) Ok. Nhos pode kanba.

Manel Mangradu ben ta kóre, e roxa na Mutxuku ki bai sota na Siza Bariga. Siza Bariga xatia, koba Mutxuku, Manel Mangradu bira pa Mutxuku e kontra ku uma soku na tésta. Manel Mangradu kai di kósta, mixa fepu na kalsa. Son Pedru da pórta “bran”, Baretu da kósta, bai xololo.

ONANÁ (pa Son Pedru) – Komu nhu dexa-nu kanba, ó ki nhu bai Téra, nhu bai na Kanbra di Praia, nhu purgunta pa Djasa, o Flú, o Dodísiu, o Ósga, o Rafonhadu; o nton nhu ta bai na Enprezas: «Sosiadadi pa Dezenvolvimentu di Nos Amigus, o na Tékinufarta Konstruson/Kola Obu, o Tekinubasta Bende Txon, o na Parukuti, o na Kaldu Verdi sen Limiti, o na Rótxa Nkarnadu, o na Ndaviva, o inda, na EFE-SA/ISCJS (Nstututu Superior di Sensia Dja Fika So Sal), Djodji Kaldu Frangu, o na Sopranfuru, nhu fla-s pa es ranja-nho txon pa nhu fase Igreja.

SON PEDRU – Sta un divogadu li ki dja papiaba-mi di nhos.

ONANÁ – Kenha?

SON PEDRU – E fla ma nhos da-l ku gas pa braku’l pórta… pamodi di uns txon ki ka éra di-nhos, ki nhos bende i el e sa ta difendeba…

Onaná djobe pa ladu, e odja Viera Lopes xintadu na un grandi skritóriu, ku Amadeue Olivera na se ladu, bistidu so di branku, rodiadu di Anju ku Santu, e da una skarera, e salta paredi di Seu e torna bai fika la Infernu.

ONANÁ (soris ta baza, ku odju nklisadu na kabésa) – Si N teneba un latinha di gás… N ta mostraba-el! Si nha rapásis staba djuntu ku mi N ka ta koreba del.

RAI DI INFERNU – Mas ali e ka la. Kanba dentu i bu fika ketu. Ali nun finadu ka ta pagadu pa faze kusa ki otu kre. Livru di Skritura ali ka ta rinkadu folha, txon di Infernu ka ta bendedu. Kanba, bu bai fika djuntu ku kes Notáriu ki bu paga pa falsifika skritura, pa poi ma txon di un e di kel otu, pa bu fika riku-podri.

Rai di Xuxu da-l un pintxu e kai dentu di un braku, xeiu di lumi, e atxa la: «Fernandu Soza, Lídia Soza, Orlandu Britu, David Kapristanu, Ntoni Nuni, Jorzi Piris, Jean Kristian, Arnaldu Silva, Mariâ Elena, Armindu Silva, Rafael Fernandi, Alfredu Karbadju, Mariâ Albertina, Rita Ramu, Mariâ di Seu, Elsa Baion, Vitor Soza, Mariâ Leanor, Djuzé Manel, Ivoni Brilhanti, Vanderlei Soza, Karlu Albertinu, Djuzé Tomás, Karlu Vega Jr., Albertu Melu, Palu Soaris, Danial Silva, Abílu Roxa, Kuládia Patrísia, Simon Monteru, Joan Pedru, Linu Públiu, Agustinhu Lopi, Luis Sapinhu, Ntóni Sérziu, Fláviu Delgadu, Fransisku Amadu, Omar Bari, Sandra Delgadu, Joakin Sapinhu, Luigi Zirpoli, Jilbertu Batistini, Sergei Souvorov, Djuzé Texera, Manel Natividadi i Jorzi Karlu Fonseka».

XIV SÉNA

Soldadu Baretu ku más mil finadu maradu na kórda, torna konko na pórta di Seu.

SON PEDRU – E kenha?

SOLDADU BARETU – E mi Baretu, kunpanhadu ku mil alma.

SON PEDRU – Mil alma pa dentu, (Finadus kanba) Baretu…

SOLDADU BARETU — Sin! Baretu.

SON PEDRU – Soldadu Baretu?

SOLDADU BARETU – Aian!

SON PEDRU – Pa Infernu.

La unde e ta da pórta «bran» Baretu txusi kabésa, pórta kasa-l piskôs.

SOLDADU BARETU – Uuuui!!! Son Pedru, dja nhu kasa-m piskôs. Nhu froxa pórta dizimóla. Uuuui, nhu ta mata-m, Son Pedru.

SON PEDRU – Nton sai bu bai Infernu.

SOLDADU BARETU – Nhu froxa pórta N ta sai. Sima N sta li N ka ta konsigi!

SON PEDRU (froxa pórta un kusinha, e soti onbru más un bokadinhu) – Soldadu Baretu, bu sa ta abuza di mi pamodi N sta bedju?! Dja bu sabe ma N tene dos mil anu!

SOLDADU BARETU – Nton nhu froxa pórta más un-kóxi N ta sai.

SON PEDRU – Soldadu Baretu, dja N fla-u pa bu ka abuza di nha frakéza. Dja N flada ma bo e buskarudu. Bu sta buska poi Nhor Dés pa ratira-m konfiansa komu porteru.

SOLDADU BARETU – Son Pedru, ka dja N fla-nho ma N ta bai?!

SON PEDRU (froxa pórta, Baretu da zupu, xinta na se kadéra) – Soldadu Baretu labanta di nha kau, bu bai xinta na di bo, la pa Infernu. (Soldadu Baretu ka liga-l) Soldadu Baretu, bu ka sa ta obi? Bu sa ta da pa moku? (E pega Soldadu Baretu na mo, ki da-l safardiada) Bon, bu ka kre sai… dexa-m bai fla Nhor Dés, go, N ta odja si bu ta sai o nau.

XV SÉNA

SON PEDRU (sakedu dianti di Nhor Dés ki sta xintadu na un kaderon) – Nhor Dés, N ben fla-nho, ma kel finadu Baretu ki nhu mostraba-mi se letratu, dja kanba afórsa, dja xinta na nha lugar, ka kre labanta, kifari pa sai na ruâ.

NHOR DÉS – Baretu?! Soldadu Baretu?

SON PEDRU – Aian, Nhor Dés. É fla ma si nomi e Soldadu Baretu. Dezaforadu!

NHOR DÉS – Pedru!!!

SON PEDRU – Nhor Dés, e ben un bes, N bota-l na ruâ. N fla-l ma si kau sta e la Infernu; e bai, e torna ben ku mil finadu djuntu ku el. N poi kes mil finadu dentu, ael N manda-l da meia volta. E torna ben ku más mil alma, N poi mil alma kanba tudu, na fin, el e kanba zúpu, sen N manda-l, e xinta na nha lugar.

NHOR DÉS – Pedru!!!

SON PEDRU – Kaba, fladu ma e fla, ma nhu sta bedju, ma mi N sta ditioradu.

NHOR DÉS – Pedru!

SON PEDRU – I kusé go ki N ta fase?

NHOR DÉS – Kusa ki bu ta fase… mi ku el nu kun­bina, ma si e konsigi salvason pa se mo, pa N ka toma. I ditu-fetu.

SON PEDRU – Nton gosi li… el ki e porteru?

NHOR DÉS – Deós ta difende… Oh! N ta difende, mos. Porteru e bo i, txaskan bo. Nu ten ki djobe manéra di tra-l di la.

SON PEDRU – Modi nton, Nhor Dés?!

NHOR DÉS – Ael e dodu na sábi, e gosta di fésta, e ta adora toki. Ba ruma un xis Anju bu poi toka flóta, ó ki e obi e ka ta rezisti, e ta labanta pa e bai da fe, bu ta kóre bu ta bai xinta na bu lugar.

SON PEDRU – Uápu! Badju mé e ntentadu! Dja djugadu e ka Nho ki inventa-l.

Son Pedru toka sinu, tres Anju bistidu di branku ku dos asa di kada un na kósta kanba ku flóta na mo. Nhor Dés sai, Son Pe­dru fika ta fase jéstu ku mo sima ki e sa ta diriji un orkéstra, Anjus komesa toka. Baretu fika ta ginda kabésa, ta sukuta ku mutu atenson. E da dos pasu, korason ka djuda-l, e torna vira na skarera e bai xinta. E torna labanta, e anda te metadi, e djobe pa trás e torna toka skarera, e bai xinta. Son Pedru fase ma ka sta liga-l, ma ka sta odja-l. Baretu ka rezisti, e torna labanta e avansa, ta bai ta badja ta fase tipu akrobasia ku stripitis. Son Pedru purbeta un óra ki e deta na txon, da uma skarera pa e bai xinta. Baretu rabida rostu, odja-l kuazi ta xinta. Son Pedru staba bedju, un kóxi pospôs, Baretu da un sakada se trás, timenti Son Pedru ta konpo pa e xinta, ta libra pa e ka mágoa se dór di kadera, Baretu txiga xinta bruku, es fika djondjodu na konpanheru, xintadu n’omesmu kadera.

XVI SÉNA

Na sala di julgamentu.

RAI DI INFERNU – Kel Omi, ki N ka ta límia nomi. Na kualidadi di Purkurador…

SOLDADU BARETU – Senhor Juís, si e ta purkura algen, e ka pode nkrimina-m!

NHOR DÉS – Baretu, Purkurador ki e fla ma el e, e ka ma e ta purkura algen, o ma el e buskarudu. El e divogadu pa e kulpa-u di kusas ki bu fase Mariâdu.

SOLDADU BARETU – Divogadu?! Te na Seu tanbe es kre konta mentira?

NHOR DÉS – E pur isu propi ki el e Rai di Infernu… ki N panha-l N po-l la.

SOLDADU BARETU – Kre e pensa ma mi ku el, nos e koléga! Ami na Téra éra so batóta ki N gostaba di djuga… ku ses mudjer ki N ta tomaba i ses fidju fémia ki ta koreba nha trás. Mas N ka ta faltaba ningen.

NHOR DÉS (pa Rai di Infernu) – Rai di Xuxu pode kontínua.

RAI DI INFERNU – Purtantu, N ta pidi péna minimu pa reu, pamodi kusa ki e fase, dja pasa tudu medida.

NHOR DÉS – Si bo gosi li bu kaba di fla, ma kusa ki e fase dja pasa tudu medida, nton bu ta pidi péna mínimu pa el?

RAI DI INFERNU – Klaru! Péna mínimu. Pena la baxu… la djuntu ku mi. E ka pode sta li riba… li na kau ki N ka ta limia se nomi.

NHOR DÉS – Aaaahn! Dja N ntende. Mínimu pa bo, ker dizer “Infernu”. (Rai di Infernu da ku kabésa, kontenti) I másimu… (Xuxu runha rostu) Seu. (E tapa obidu, e fitxa odju) Nton go, nu kre obi kusé ki bu tene pa bu fla-nu, ki ta nkrimina reu.

RAI DI INFERNU – Krimi di «Porkariâ»: reu so toma banhu, pamodi e dadu, kantu e bai trópa, ku 18 anu na korpu; krimi di «Konstruson Klandestinu»: e fase baraka na Várzia, sen ki e tra lisénsa, so di po-di-mandióka ku papelon. Nu imanjina, si purakazu pega lumi, kantu bonberu ki ten ki txomadu pa bai pa paga lumi?; krimi di «Pirgi­siti» konjugadu ku «Mentirisi» i «Ladrisiti»: so pa e ka bai panha águ la Taití, e ngana Bedju ma e ten medu di sangi, mas e mata karneru, e kume figu ku bófi-bófi fepu na ferbura, e fla Bedju ma karneru ka ten figu nen bófi-bófi; krimi di «Makakisa» konjugadu ku «Ratunerisi»: e purgunta Bedju si e pode panha un karôs di karni, e panha dos; krimi di «Falta di Poku Ruspetu» i di «Disvergonhura»: e fika ta da omi bedju fus na rostu, nen e ka ta pidi diskulpa. Un óra propi Bedju ngasga ki dja moreba dja; krimi di «Ezersísiu di Pur­feson Falsu»: reu da pa Dotor, ma e ta kura fidju di Dimistra­dor, pur-fin, e puxa 80, e sapa-l garganton; krimi di «Karnali­dadi» konjugadu ku «Pedofilia», o seja, kubisa mudjer dus-otu» i nterese na fidju fémia di kada un; krimi di «Abuzu di Forsa» i di «Violason di Direitus di Bed­ju»; krimi di «Travestismu»: ael komu omi, e da un otu omi gazadju i es deta djuntu riba di mesmu papelon na txon, es kubri tudu ku o’mesmu padás di plástiku; krimi di «Uzurpason di Poder»: e finta Pedru e xinta na se lugar; pur-fin, krimi di «Rúsgia Badju»: sen ki e kunbidadu e bai obi Anjus ta tokadu flóta. (E djobe pa Nhor Dés) Sta fladu.

NHOR DÉS – Nton bu ka tene más kusa pa bu fla?

RAI DI INFERNU – E simé: mas dos krimi di «Furtu di finadu», ki e bai panha la na mínimu e tarse li pa másimu.

NHOR DÉS – Baretu, kabu sta-u mariâdu! Bu ten al­gun kusa fla pa bu diféza.

Baretu ta tuntunhi, Virja Mariâ ta kanba.

SOLDADU BARETU – Óh Nha Vírja Mariâ parida: anha ki pari matxu, ki pari fémia, ki pari branku ki pari pretu, ki pari riku ki pari pobri, ki pari dretu ku tortu, dizimóla nha rabate-m, nes momentu ki kel gardion la, fidju di krótxa, kre pa N kon­denadu.

VIRJA MARIÂ (pa Nhor Dés) – Ki krimi ki rapás komete, nha fidju?

NHOR DÉS – Nha mai, anha e mutu nha mai mé… mas kusa ki rapás li fase, sima Purkurador fla kel óra, pasa tudu medida.

E longa-l lista di akuzason.

VIRJA MARIÂ (le akuzason, e sukudi kabésa) – Nha fidju, manda tudu Finadu ki sta li, Anju, Santu i Rai di Xuxu sai na ruâ, N meste fika mi ku bo, ku Pedru.

NHOR DÉS – Nhos da-m lisénsa di sala, menus Pedru, dipos N ta txoma-nhos. (Es sai tudu) Nha mai, rapás la ka brinka­déra! Ku kel korpu poku sima bu odja-l ku el la… mas kusa ki e ta fase!… bu ka ta fla ma e el.

VIRJA MARIÂ – Nha fidju, ranja fórma na kaba ku kel kusa li más faxi posívil, pomodi bu ka xinti ma si kusa purlonga ma brónka pode da?

NHOR DÉS – Brónka di kusé? El e fase pekadu, N ta kondena-l pa Infernu!

VIRJA MARIÂ – Nha fidju, odja ma e pode rakóre, ma e pode mete divogadu, gosi li ten txeu divogadus…

NHOR DÉS – Mas modi, nha mai? Divogadu ta disfase kusa ki e fase?

VIRJA MARIÂ – Divogadus ka ta disfase kusa ki e fase mé, mas es pode da kónta ma akuzason sta mariadu, es pode djunta finadus es poi fase manifestason, es inpúgna, es mete Pedru, ku Seu, ku bo na un grandi nkrénka.

NHOR DÉS – Nkrénka modi, mamá? Anha, kel Purkurador la sperienti! Dja e ten dos mil i tal anu di spirénsia… ta nkri­mina finadus. I ka nha skese ma tudu kusas mariadu ki Baretu ta faseba na Mundu ma éra ntentadu pa el.

VIRJA MARIÂ – Mas lenbra ma dja e sta bedju. Ma algun kusa pode skapa-l baxu kapus. Bo bu ka sabe si na meiu di finadus ki sta li, ka sta nenhun komandanti pa organiza manifestason? Odja ma gosi li kusa e ka sima un bes. Dotoradu sta pa tudu kau, kaba, so balenti. Es ka ten medu nen di konbatenti.

NHOR DÉS – Kel go nha ten rezon. Rapasis ta pila géra te dentu Parlamentu.

VIRJA MARIÂ – Aaanh! Bu txeka?!

NHOR DÉS – Ka ta da pa ka txeka, nha vélha. N sabe ma rapasis di gosi, óras ki tolus po-s poder, es ta kuda ma mundu interu e di-ses.

VIRJA MARIÂ – Odja li: abo bu sabe ma tudu kenha ki kunpra robu, o ki guarda robu na se kasa, ma tanbe e ta konsideradu ladron.

NHOR DÉS – Si ki sta na lei mé.

VIRJA MARIÂ – Anton?! Kes finadadas tudu ki sta li santadu na papel, ma Soldadu Baretu furta, e ka li Seu ki es sta tudu-fepu? E ka Pedru ki po-s kanba?

NHOR DÉS – Nha mai?!… E si mé! Nha sabe ma N ka sa ta odjaba kusa asi, des manera? Rapasis e so konfuzentu! Dotora­dus o kumandantis. Tudu es ten maniâs di bodóna… di ka tem kónta. Pedru, manda-s pa es pode kanba. (Es ta kanba tudu es) Nha Gentis, senténsia ta fika markadu pa di-li dos mil anu, pamodi ten algun kusa ki meste ser sklaresedu.

RAI DI INFERNU – Kusa di mudjer… dja N sabeba! Unde es sta, es ki ta da ordi!

NHOR DÉS – Pedru, kontínua porteru sima bu staba, Baretu ta fika bu ajudanti.

RAI DI INFERNU – I e sta bai fika la na kau ki e ta manda. Tudu finadu ki bai la e ta dexa kanba. Infernu pode fitxa pórta i fulia txabi la pa fundu di infernu.

SON PEDRU – Mas Nhor Dés, ki ta kontínua ta manda la na pórta e mi!

NHOR DÉS – Klaru! Ki ta manda-l e bo. Sta bon si, Soldadu Baretu?

SOLDADU BARETU – Ótimu, senhor Nhor Dés. (E ri, e bai pa Son Pedru, e soti-l mo na bolsu e tra katxu di txabi e fika ta txokota, ta fase Rai di Infernu sinal ku dedu) Nhu sáita fóra N meste fitxa pórta.

Rai di Infernu sai ku raiba, Ba­retu fika ta salta, ta ri di kontentamentu.

Comentários  

0 # KORE SIN: 06-07-2020 09:16
Na Infernu Onana atxa kes Finadus li:
Fernandu Soza, Lídia Soza, Orlandu Britu, David Kapristanu, Ntoni Nuni, Jorzi Piris, Jean Kristian, Mariâ Elena, Armindu Silva, Rafael Fernandi, Alfredu Karbadju, Mariâ Albertina, Rita Ramu, Mariâ di Seu, Elsa Baion, Vitor Soza, Mariâ Leanor, Djuzé Manel, Ivoni Brilhanti, Vanderlei Soza, Karlu Albertinu, Djuzé Tomás, Karlu Vega Jr., Albertu Melu, Palu Soaris, Danial Silva, Abílu Róxa, Kuládia Patrísia, Simon Monteru, Joan Pedru, Linu Públiu, Agustinhu Lopi, Luis Sapinhu, Ntóni Sérziu, Fláviu Delgadu, Fransisku Amadu, Omar Bari, Sandra Delgadu, Joakin Sapinhu, Luigi Zirpoli, Jilbertu Batistini, Sergei Souvorov, Djuzé Texera, Manel Natividadi i Jorzi Karlu Fonseka».
Responder
0 # Eunice Elisabeth Sem 04-07-2020 23:47
Obridada, um texto muito bonito.
Responder