Cultura

Cultura

Karta di kanpunes

• Por Redação
• 25 de Jul de 2020

Txuba!

Dja nu bebi rekadu ki bu manda-nu

Ku rafega di bentu ki pasa gosi li

I nos tudu nu fika ku surizu ratxadu

So di sabi ma bu sta na mara troxa

Pa bu kunsa ben sen dia di bai

Diskansadu bu podi ben

Ku kurason abertu nu ta spera-bu

Vizinhus dja ka marka simentera

Omis dja ka nkunha inxada

Ki dja duraba prindadu na kumera di kasa

I mudjeris dja ka poi simenti na vental

Es teni pe ku gana di ntudja koba

Disprinda faxi fla-nu mantenha

Nu sta li xintadu lapu

Uns ku mo pregadu na kexada ta matuta

Otus ku petu abertu ta spera bu abrasu solopadu

Ah, txuba amigu!

Sima anu di riba ka bu faze-nu

Ki bu arma so arma i bu ka ben

Tudu nasenti seka toradu

Limaria bira ta bebi bentu i ta maskaba pedra

Pa ka mori ku bariga intxadu

Ku faronpa tanbe ka bu ben

I nen ku dizaforu pa bu ka foga kasa

Di fidju parida ku bu furia

Kori mansu, ben fla-nu mantenha

Ku agu ki ta disprinda di bu rostu

Ti ki bisti tudu rubera di speransa

Sima nomi di nos tera, Kauberdi!

• Tags
• #ONU
• #Editorial
• #TACV
• #TAP
• #ICAO
• #CVA
• #Emirates