• Praia
  • 29℃ Praia, Cabo Verde
Kriolu *
Cultura

Kriolu *

 

Lingua ki nasi ku furia

Ki sakudi ka lansa na tenpu di N´juria

Ki djondjoli susti na petu vitória

Sima kaiunbra na ponta rotxa

Kriolu maradu na korda tesedu

Trankadu korente na tudu si dedu

Maradu boka ku medu pa ka ruedu

Kauberdianu kauberdi!

Kriolu raisa sima tosa brabu

Ki kusta novi fiu di kabelu dôs pingu-l babu

Mea kabesa, kuatu rabu

Undi ki sol ku lua ta kontra

ki buru ku besta ta sura.

Kriolu ki podu na krus

Ki bisti noti di lus

Ki muda kueka pa trus

Oxi si linha sta spadjadu pa tudu steju

Kriolu ki bari bentu

N para puera pa si sustentu

Ki nasi na kaminhu lentu

Di tres kruzamentu:

Purtugezis ki arma en burges

Fransezis ki txupa moda meses

Inglezis ki txabeska na tudu es

Na lingua-l mundu

Lingu ki raboita kosta pa bentu sul,

Toma bensu na Kau-Berdi sėu azul

Longa brasu fla kul

Rabata pe da kol na txon.

Kriolu boka tapadu

Lingua farapadu

Kalsa ramangadu, bolsu txapadu

Ku sentidu forti ti na xintidu

Ku gana, mas ingana

E labanta e stika kanela

E ingoda petu di tudu moku panela

E abri porta kandankan e fitxa janela

E toma mundu pa ponta

Kriolu finka pe na txon mara bentu

Kuspi bafu sota bentu

Sua suor di barlabentu

Santadu registadu na boka-l kauberdianu

E sima kuxan ku mixan

Sima trintxanti ku marinhanti

Y sima benka ku benka-benka

Ki ingoda tas da ku katas-tas

Sima txentxu da pintxentxu

Kriolu letradu soletradu

Tratadu retratadu

Geradu non kunpradu stikadu konpasadu

Lingua sabi boka doxi

Kiolu ten kanela kunpridu sima girafa

Ki mesmu na kuarta ka mesti mon pa rafa

Kuantu mas pe txebi na boka-l garafa

O na undi ki manenti e kumi bafa,

Txora, kanta kriolu.

Kriolu ki kanta na nos korason

Ki regista-nu kumu un nason

Ki fazenu un sėu y un manson

Undi ta tirmina kantiga ta komesa orason

Na kutelu sodadi, txan di dispidida

Kriolu koradu na fundu-l fornu

Maradu ornegadu na tornu

Oji e sta ku sulada maradu ta da ku tornu

Na briu di si nobresa

Kriolu dja balsera sima bongolon

Parida na txada polon

Dja stiba kaminhu di burges ki bem pa rafilon

Sima rengal di pilon

Nôs lingua e un maravilia

Spadjadu pa tudu ilia

Ki fla txeu sima ligadu na pilia                                                                                                                                                                    

Kriolu ti oxi e ka rapasadu

E senpri prizenti y konpasadu

Jueliu abertu pe ragasadu

Santadu na batenti-l porta

Ka bendedu ka fiadu

Ka tomadu ka dizafiadu

Ka konxi fiadu nen kunfiadu

Na kasta di si dizenvolvimentu

Kriolu dja da kamaliota dja da kangaluta

Dja kria ferol sima mordedura banbaluta

Ki ka ten koketa ka ten forketa na luta

Pa toma-l si kazadju

Kriolu busu korda di pe uis!

Rabenta korenti zas!

Kanba dentu paredi sai

Da onbru na omi grandi bai

El ke altu-rotxa runhu

Ke pedra di inkunhu

Ki spanta burges ku si propi punhu

Kriolu ten alma gêmia, korpu txon

Na si forsa e spludi kaxon

E raisa na lansol di paxon

E subi riba la na puleru e ronka

Ten sangi di tenpra-l Kabral

Ta ferbi ki nada ka podi kebra-l

Pamodi e musturadu, stramadu ku nôs moral

Txapadu y djondjadu ku nôs fe kultural

Kriolu nasi na petu leti

E sanha sima lion na rameti

Ki Ngoma petu feti rafeti

Rama flora na interneti

El ke badiu pe ratxadu

Korpu soltu tripa djondjadu

Ramangadu mordjedjadu

Kriolu ki da matxadu denti

Ki fra balai tenti

Ki sega maxin di kes genti

Gordu rixu balenti

Pos pa tras fika pa frenti

Kriolu dja splodi sima vulkon

Si lava dja kori pa tudu rubera ku kobon.

* Poema de Manuel Furtado Pereira, mas conhecido pa Leonor-Poeta de Ribeira da Barca na Concelho de Santa Catarina, mi é escritor, poeta e Mestre em Ética e Filosofia Política pa UniCV. Ainda autor de 10 obras di poezia resumido em 1500 poezias mas ainda n ka públika nenhum des obras.

Es poema li é extraídu di 1ª obra “Kadabras na Prasa” skritu na 2007. Es obra di poezia li ten 56 poezia y sta resumidu na 105 páginas.

Partilhe esta notícia

SOBRE O AUTOR

Redação