Cultura

Cultura

Mentira e sagradu

• Por Redação
• 6 de Jun de 2018

Mentira e un kusa sagradu

Ki atoa ka debe kontadu

Pa ó ki na sériu e mestedu

Más ki verdadi del e sirbidu.

Ó ki un mentira e ben kontadu

Más ki mil verdadi e ta setadu.

Mil verdadi pode bale mil tapóna

Ku un mentira pode libradu di gilhotina

Kontadu dretu pode strobadu

Ki kualker kastigu panhadu

Mas txeu verdadi si konfesadu

Ka ta inpidi di ka kondenadu.

Pamodi kenha ki konfesa se pekadu

E sta konfirma ma e fase kusa mariadu

Nton e ka debe fika dispurparadu

Pamodi e ka ta skapa di ser kastigadu.

Pamodi pa lei ki ta konta e ka verdadi.

E próva sertu ki ten ki mostradu.

Pa kulpadu pode uzadu tudu maldadi

Mas pa kondenadu ten ki ta provadu.

Pur isu ki si fasedu kaba negadu,

Ka parse próva pa kontrariadu

Sikré di bóka mai algen e pragadu

Pa kadiâ e ka pode mandadu.

Mas infilismenti e ka si ki ten kontesedu.

Pa suspeta i ku abuzu ta prendedu,

Sen diféza i ku malísia ta julgadu

Sen próva i ku mó pesadu ta kondenadu.

Nton mentira debe ruspetadu,

Si ka rokadu e ka debe kontadu.

Un bes pur anu e debe lenbradu,

Pa ka pasadu diâ un di Abril nsodadu.

• Tags
• #Ponto de Vista
• #José Luís Semedo da Silva