• Praia
  • 29℃ Praia, Cabo Verde
AZAGUA
Colunista

AZAGUA

Ka ten nun kabu más Verdi ki di nos:

Si kre sen txuba, sen riu sen lagoa, mesmu sen floresta, sen kaxuera i sen verdura – Cabo Verde é uniku tera na mundu ki ta karega na si kosta un nomi ton dizejadu. Arguen podi fla, mas afinal es nomi ka ta kunbina ku si donu, má ka tinha nun otu nomi ki ta xintaba es kabu, midjor di ki verdi. Tera fértil sima berdiana - ta txobi di noti floresi di dia.

Na kabu Verdi ora ki txuba sa ta txobi é un spetakulu devinu, é sima, si Ilias ta resebel ku dueju finkadu i di brasu abertu. Un bon berdianu ta daba tudu pa odja agu ta pinga di seu. Azágua é ka un sinplis trabadju di kanpu, é ka só koba txon, simia, munda, korta, kata i rosa. Azagua é konpaxon di nhor Deus; é kabu modjadu, kabu fresku, kabu verde, é kabu di nxada granpadu na mó ki lapizera nega, é sol na kosta di omis di pedra ki ta dobra riba di si stomagu pa fasi midju sónbra, inda ta regal ku soris di ponta si naris.

Banku d’oru tudu fitxadu, karta tudu na gabeta, taberna baziu, fornadja friu. Omi kel ke omi , sé ka bedju, é ka duenti, é ka malandru,  sta tudu na trabadju D’ azagua.

Es anu sima ki sol sta mas forti ti ki tudu anu, rapasinhus dja kansa dja xinta, mudjeris dja po sulada riba kabesa,- ma sol sta mas forti ki limon - es rasmunga.

ORA D’ARMUSU!...

Un voz di mudjel noba, kanpia di kalbisera ti pé di lugar, sima soldadu xines ta manobra arma si ki omis manobra ses nxada, ki para di kanta tudu o mesmu tenpu, diskansa kabu na txon di masapé

- Un kusinha konta abri pititi – djoka npara un kopu di vidru grandura dedinhu, anti intxi é supendi kopu é lebal dibagal ti ponta bexu é bota un golpi la garganta, é lansa restu na pé di midju…

 – Mos bu ta da midju moku- Ciza flal rostu serio,

- Si kel sol li ka kental nen kel grogu li ka ta gateal - joka rispondel,ta ri timenti ta deta kabelu ki arguil na korpu kantu é da penalti di grogu fedi.  Grasa intxi ladera, disfalsa txeru di aroz fumadu ki sai di un panelona di  loja Manel dos Anju.

Kinta fera, es da notisia na televizon di Cabo Verdi ma azagua es anu é mariadu, es nobidadi kai sima ora ki nhu ka podu vistu. Sima trabadju di azagua é kansadu i karu, dipos di tudu nvestimentu si txuba ka txobi o txobi fora maré é duedu. 

Tenpu di azagua é sabi, é un bai ku ben di anti maxi ti kanbar di sol, é pilon ta zini, kuzkuz ta subi, leti da dixi, tosinhu ta boia na fixon, kafé ta  clotxi na garafa ternu;  é simenti na bandola é leti na mama  pa mininu, leti na baka pa bixeru, leti na boli pa rapasis.

Txon, ten kel ke moli, un nxadada un koba, ten otu ke pedregal, ke pa libra pedra, pa finka nxada. Ten txon na ladera, ki podi trabadja sen dobra kosta, ten txon na pe di munti, ki ta trabadjadu sol na totis; ten txon longi kaminhu prigu, ten txon na orela kasa, sonbra pinton ku liton.

Mas sabi kusa ki ten, é midju madul na fodjada, kordera floradu na txon, bolonbolo ta pidi panha, bongolon kasadu ku arros, txitxarinhu ka mesti tra spinhu, baxinha ku kabalinha, sapatinha, fava, fixon kongu, mel, mantega, rakexon.

Anu di bon azágua- nharas nobu ta gudja mama, mudjeris ta rodonda koxa rapasis ta bira tunturun, mininas ta bira bolonbolu, guentis bedju ta rastora, buru ta zura, baka ta bombia, rapasis ta djata, mininas ta gadjeta, ti galu ta kanta mas sabi.

É bon ki tudu anu nu djunta fé nu djunta rasa nu djunta mo pa simentera.

Nu pidi dios pa da nu txuba, pa danu agu di sustentu, pa danu kel ki nu podi kol. Bom azagua pa tudu berdianu!

Partilhe esta notícia

SOBRE O AUTOR

Carlos (Princezito)